ချစ်သော စကားပြန် (The Interpreter) တရုတ်ဇာတ်လမ်းတွဲဟာ 2016 ခုနှစ်က ထုတ်လွှင့်ပြသခဲ့တဲ့ ဇာတ်လမ်းတွဲဖြစ်ပြီး မင်းသမီး Yang Mi နဲ့ မင်းသား Huang Xuan တို့က အဓိကပါဝင်ထားကာ စာရေးဆရာမ Miao Juan ရဲ့ဝတ္ထုကို အခြေခံရိုက်ကူးထားတာ ဖြစ်ပါတယ်။ ဒီဇာတ်လမ်းတွဲဟာ တစ်နှစ်တာအတွင်း အဆင့်သတ်မှတ်ခံရမှု ထိပ်ဆုံးမှာရပ်တည်ခဲ့ပြီး ပျမ်းမျှတစ်နိုင်ငံလုံး ကြည့်ရှုမှုအဆင့်သတ်မှတ်ချက် 2.63% ရှိခဲ့တာဖြစ်ပါတယ်။
ပြင်သစ်ဘာသာကို အဓိကလေ့လာသင်ကြားနေတဲ့ ကျောင်းသူ Qiao Fei ဟာ ငယ်စဉ်ကတည်းက စကားပြန်တစ်ဦးဖြစ်လာဖို့ကို အိပ်မက်မက်ခဲ့ရသူပါ။ ရောဂါဝေဒနာ ပြင်းထန်စွာခံစားနေရတဲ့ မိခင်ဖြစ်သူနဲ့အတူ ကြီးပြင်းလာခဲ့ရသူဖြစ်တာကြောင့် စားပွဲထိုးအဖြစ်လုပ်ကိုင်ကာ သူမရဲ့စားဝတ်နေရေးပြဿနာအတွက် ဖြေရှင်းနေရသူလည်း ဖြစ်ပါတယ်။
တစ်ညမှာတော့ သူမဟာ ဧည့်သည်တစ်ဦးနဲ့ ပြဿနာဖြစ်ပြီး ရဲစခန်းကိုရောက်သွားခဲ့ပါတယ်။ ဧည့်သည်မှာ အသက်ငယ်ငယ်လေးသာရှိသေးပေမယ့် နာမည်ကြီး ပြင်သစ်စကားပြန်ဆရာ Cheng Jia Yang ပဲဖြစ်ပါတယ်။ နောက်တစ်နေ့မှာတော့ သူမနဲ့ပြဿနာဖြစ်ခဲ့တဲ့ Jia Yang ဟာ သူမအလုပ်အတွက် ဝင်ခွင့်ဖြေဆိုရမယ့် စာမေးပွဲစစ်ဆေးသူဖြစ်ကြောင်းကို သိခဲ့ရတာပါ။
Qiao Fei ဟာ စမ်းသပ်မှုကို အောင်မြင်စွာဖြတ်ကျော်နိုင်ခဲ့တာဖြစ်ပြီး သူတို့နှစ်ယောက်ရဲ့ တွေ့ဆုံမှုဟာ မှားယွင်းတဲ့ခြေလှမ်းဖြင့်စတင်ခဲ့ပေမယ့် နောက်ပိုင်းတွင် တစ်ယောက်နဲ့တစ်ယောက် ခံစားချက်တွေ စတင်ခဲ့ကြပါတယ်။ အရာအားလုံးက အဆင်ပြေချောမွေ့သွားပြီလို့ထင်ရပေမယ့် ပြဿနာတွေက တစ်ခုပြီးတစ်ခုပေါ်ပေါက်လာခဲ့ပါတယ်။ Jia Yang ရဲ့မိခင်က သူတို့နှစ်ယောက်ရဲ့ဆက်ဆံရေးကို ပြင်းပြင်းထန်ထန်ကန့်ကွက်ခဲ့ပြီး Qiao Fei ရဲ့ချစ်သူဟောင်း Gao Jiaming ပြန်လည်ပေါ်လာခဲ့တာက သူတို့နှစ်ယောက်ကြား အခြေအနေကို ပိုအထင်လွဲမှားမှုတွေ ဖြစ်ပေါ်စေခဲ့တာပါ။
ပိုမိုရှုပ်ထွေးလာတဲ့ ပြဿနာတွေက သူတို့နှစ်ယောက်ကို လမ်းခွဲမှုဆီကို ဦးတည်သွားစေခဲ့တာပါ။ သူတို့နှစ်ယောက်ရဲ့ အချစ်ရေးက တကယ်ပဲအဆုံးသတ်သွားမလား၊ စစ်မှန်တဲ့ချစ်ခြင်းတွေက တကယ်ပဲ သေဆုံးသွားမလားဆိုတာကို ကြည့်ရှုရမယ့် အချစ်ဇာတ်လမ်းတွဲလေးတစ်ခုပဲ ဖြစ်ပါတယ်။
ချစ်သော စကားပြန် (The Interpreter) တရုတ်အချစ်ဇာတ်လမ်းတွဲလေးကို https://www.viu.com/ott/mm/mya/all/ တွင် ကြည့်ရှုနိုင်ပါတယ်။
